Lánareglur og lánakjör

Eingöngu fyrirtæki í meirihlutaeigu konu/kvenna geta fengið ábyrgðartryggingu/lán. Gerð er krafa um að í verkefninu felist atvinnusköpun.  

Hægt er að sækja um lánatryggingu vegna eftirtalinna þátta: 

• Markaðskostnaðar
• Vöruþróunar 
• Nýrra leiða í framleiðslu eða framsetningu vöru/þjónustu.

Almennt
Unnt verður að sækja um lán fyrir verkefnum innan fyrirtækja sem leiða til atvinnusköpunar og
verðmætaaukningar. Mat er lagt á viðskiptaáætlun fyrirtækisins og/eða þess afmarkaða
verkefnis innan fyrirtækis sem ábyrgð á láni er sótt um og er grundvöllur umsóknar.
Ekki er veitt ábyrgð á láni fyrir óhóflegum launakostnaði við vöruþróun, sölu- og markaðsstarf.
Að jafnaði er ekki veitt ábyrgð á láni fyrir reglubundnum rekstrarkostnaði.
Til greina kemur að veita lán fyrir tækjum sem eru nauðsynleg rekstrinum og/eða verkefninu
en þá með veði í umræddum tækjum. Lánað er fyrir kostnaðarverði tækjanna að því gefnu að
notkun á þeim leiði til atvinnusköpunar og verðmætaaukningar.
Boðið verði upp á val á milli óverðtryggða og verðtryggða lána. Lánstími þarf að vera 5 ár fyrir
verðtryggð lán.

Lánstími
Að jafnaði skal miðað skal við að lánstími sé ekki lengri en 5 ár.

Lánsfjárhæð
Lán skulu ekki vera lægri en 3 milljónir króna og ekki hærri en 15 milljónir króna.
Undantekningar frá þessu ákvæði skulu samþykkt bæði af stjórn Svanna og af bankanum.

Vaxtakjör
Vaxtakjör eru í samræmi við kjörvaxtaflokk 2 hjá Landsbankanum, eins og þeir eru ákveðnir á
hverjum tíma.

Lántökugjöld og önnur gjöld
Lántökugjald er 1,50% óháð lánstíma. Lántökugjald er innheimt við útborgun láns. Kostnaður
vegna skjalagerðar er samkv. verðskrá bankans hverju sinni.

Fyrirkomulag innheimtu
Innheimta lána fer í gegnum innheimtuferil Landsbankans og skal vera í samræmi við
innheimtuferil bankans eins og hann er á hverjum tíma.